பிரேசில் நாட்டில் உள்ள ஒரு முக்கிய நகரில் பாலம் ஒன்று திடீரென இடிந்து விழுந்ததால் ஏற்பட்ட விபத்தில் 2 பேர் பலியாகினர். மேலும் 19 பேர் படுகாயம் அடைந்து உயிருக்கு போராடிய நிலையில் மருத்துவமனையில் சிகிச்சை பெற்று வருகின்றனர்.
இதனிடையே, பிரேசில் நாட்டில் உலகக்கோப்பை கால்பந்து நடப்பதையொட்டி அங்கு போக்குவரத்து நெருக்கடியை தவிர்க்க பல புதிய பாலங்கள் கட்டப்பட்டன. அப்படி கட்டப்பட்ட பாலங்களில் ஒன்றான மேம்பாலம் தான் இவ்வாறு திடீரென இடிந்து விழுந்துள்ளது.
இந்த மேம்பாலத்தின் மேலும், பாலத்தின் கீழும் நேற்று முன்தினம் பரபரப்பாக வாகனங்கள் சென்று கொண்டிருக்கும்போது மாலை 3 மணியளவில் திடீரென இடிந்து விழுந்துள்ளது. இடிந்த பாலத்தின் இடிபாடுகளுக்கு இடையே ஒரு பள்ளி பேருந்து உள்பட பல வாகனங்கள் சிக்கிக்கொண்டன. அந்த இடமே பெரும் பரபரப்பு அடைந்தது.
மீட்புக்குழுவினர் உடனே வரவழைக்கப்பட்டு இடிபாடுகளில் சிக்கியவர்களை மீட்கும் பணி தீவிரமாக நடந்தது. இதுவரை இரண்டு பேர் பலியானதாக தகவல்கள் வந்துள்ளன. ஆனால் பலி எண்ணிக்கை இன்னும் உயரக்கூடும் என அஞ்சப்படுகிறது. இந்த பாலம் இடிந்து விழும் அதிர்ச்சி காட்சி அங்கிருந்த ஒரு சிசிடிவி கேமராவில் பதிவாகியுள்ளது.
